وہ ہم سے آج بھی دامن کشاں چلے ہے میاں
کسی پہ زور ہمارا کہاں چلے ہے میاں
جہاں بھی تھک کے کوئی کارواں ٹھہرتا ہے
وہیں سے ایک نیا کارواں چلے ہے میاں
جو ایک سمت گماں ہے تو ایک سمت یقیں
یہ زندگی تو یوں ہی درمیاں چلے ہے میاں
بدلتے رہتے ہیں بس نام اور تو کیا ہے
ہزاروں سال سے اک داستاں چلے ہے میاں
ہر اک قدم ہے نئی آزمائشوں کا ہجوم
تمام عمر کوئی امتحاں چلے ہے میاں
وہیں پہ گھومتے رہنا تو کوئی بات نہیں
زمیں چلے ہے تو آگے کہاں چلے ہے میاں
وہ ایک لمحۂ حیرت کہ لفظ ساتھ نہ دیں
نہیں چلے ہے نہ ایسے میں ہاں چلے ہے میاں
جاں نثاراختر
جدائیوں کے زخم درد زندگی نے بھر دیے
تجھے بھی نیند آ گئی مجھے بھی صبر آ گیا
میں جو کانٹا ہوں تو چل مجھ سے بچا کر دامن...
میں ہوں گر پھول تو جُوڑے میں سجا لے مجھ کو...
- قتیل شفائی
ابھی سے لطف و مروت کا اہتمام نہ کر
نظر کو تیر لبوں کو ابھی سے جام نہ کر
ابھی نہ شانے سے ڈھلکا تو ریشمی آنچل
حسین شام ہے ایسے میں قتل عام نہ کر
- صابر دت
